Մաքրման և բարեկարգման աշխատանքներ Սուրբ Գրիգոր Բարձրաքաշ և Սրբոց Քառասնից Մանկանց վանքերում

Օրերս, օրհնությամբ Գուգարաց թեմի առաջնորդ բարձրաշնորհ Տեր Սեպուհ արքեպիսկոպոս Չուլջյանի,առաջնորդությամբ Տեր Աբրահամ քահանա Մարտիրոսյանի և հովանավորությամբ Վանաձորի նոտարական տարածքի նոտար Մամիկոն Ասլանյանի, Վանաձորի Սուրբ Գրիգոր Նարեկացի եկեղեցու «Նարեկացի»երիտասարդաց միության անդամները ուխտավորաբար այցելեցին Դսեղ` խոնարհված եկեղեցիների մաքրման և բարեկարգման ավանդական ամենամյա իրենց աշխատանքը իրականացնելու:

Սուրբ Գրիգոր Բարձրաքաշ վանքում, ի ուրախություն բոլորիս, կատարվում էին ամրացման աշխատանքներ ևտարածքը գտնվում էր քիչ թե շատ բարվոք վիճակում: Երիտասարդները հնարավորինս մաքրեցին վանքը խոտածածկույթից և աղբից: Վանքում Վանաձորի երիտասարդներին միացան նաև Դսեղի երիտասարդաց միությունը`առաջնորդությամբ տեղի հոգևոր հովիվ Տեր Գրիգորիս քահանա Դերմենջյանի:

Մաքրման աշխատանքներին առաջին անգամ մասնակից երիտասարդները ծանոթացան վանքի պատմությանը,շրջեցին վանքի տարածքում, որից հետո խումբը շարժվեց դեպի Դսեղի Սուրբ Քառասնից Մանկանց եկեղեցի: Ոտքով երկար ճանապարհ կտրելով և հասնելով եկեղեցի` երիտասարդները մեծ ջանասիրությամբ բարեկարգեցին նաև եկեղեցին և հարակից տարածքը: Տարածքի անբարեկարգության և քարաթափության արդյունքում ստեղծված անմխիթար վիճակի պատճառով` հնարավոր չէր պատկերացնել վանքի վեհաշուք տեսքը` անգամ խոնարհված վիճակում:

Աշխատանքն ավարտելուց հետո, քահանա հայրերը կատարեցին Արևագալի ժամերգություն և երիտասարդացմիության անդամների հետ միասնական աղոթք բարձրացրեցին առ Աստված թե Գրիգոր Բարձրաքաշ և թե Սրբոց Մանկանց եկեղեցիներում:

Երիտասարդները ուխտավորաբար եղան նաև Դսեղի Սուրբ Գրիգոր Լուսավորիչ եկեղեցում:

Բեղմնավոր աշխատանքը առավել տպավորվեց Դսեղի չքնաղ բնության գրկում երիտասարդների կազմակերպածտարատեսակ խաղերով, ազգային երգ ու պարով:

Վանաձորի «Նարեկացի» երիտասարդաց միության հոգևոր պատասխանատու Տեր Աբրահամ քահանա Մարտիրոսյանը և միության անդամները իրենց խորին երախտագիտությունն են հայտնում Վանաձորի նոտարական տարածքի նոտար Մամիկոն Ասլանյանին` աստվածահաճո այս գործին աջակցելու և մաքրման աշախատանքների կազմակերպման ճանապարհածախսը հոգալու համար:

Էմմա Գրիգորյան