Thursday, December 4, 2014

«Մեր շահը` տալն է… դրանից ստացած ուրախությունը»


Արդեն չորրորդ տարին է, ինչ Վանաձոր քաղաքի կարիքավոր ընտանիքների մի փոքրիկ մասի Ամանորյա և ձմեռային հոգսը իր հնարավորության սահմաններում փորձում է կիսել «Նարեկացի» երիտասարդաց միությունը:  «Ձեռք մեկնիր» բարեգործական ծրագրի շրջանակներում նախորդ 3 տարիների ընթացքում Վանաձոր քաղաքի խոշոր խանութներից հավաքված սննդից, պիտանի ձմեռային հագուստից, հիգիենայի պարագաներից և տարբեր անհատ բարերարների միջոցով ստացված գումարից քաղաքում օգտվել են արդեն 110 ընտանիք:
Այս տարի ևս ծրագրով նախատեսվում է սննդի արկղեր տեղադրել խոշոր մթերային խանութներում, գանձանակներ` քաղաքի տարբեր խանութներում, բուհերում: Ծրագրին իրենց մասնակցությունը կբերեն քաղաքի բանկերը, հագուստի, զովացուցիչ ըմպելիքների, կաթնամթերքի, հրուշակեղենի արտադրամասերը և պարզապես անհատներ: Մշտապես  գործում են ծրագրի գրասենյակը` առաջնորդանիստ Սբ Գրիգոր Նարեկացի եկեղեցուն կից, և հեռախոսահամարը. բացված կա նաև հաշվեհամար` դրամական փոխանցումների համար: 
«Ծրագիրն իրականացվում է բաց, թափանցիկ. յուրաքանչյուր աշխատանքային փուլի ավարտին հաշվետվություններ են տեղադրվում կայքէջերում: Ծրագրի ամբողջ ընթացքը լուսաբանվում և ներակայացվում է հանրությանը»,- նշում է թեմի լրագրող Լիլիթ Յոլչյանը:
Արդեն գրեթե պատրաստ է ընտանիքների ցուցակ, որոնց նախապես այցելելով՝ երիտասարդները ծանոթացել են վերջիններիս պետքերին և կարիքներին, իսկ դեկտեմբերի վերջին օրերին նախատեսում են նվերներով տնայցեր կատարել: Թե քանի ընտանիք օգնություն կստանա այս տարի` կախված է հավաքված օգնության չափից:
«Հուսանք՝ ինչպես նախորդ տարի, այս տարի ևս կգերազանցվեն մեր սպասումները: Նախորդ տարի ծրագրով նախատեսված էր օգնություն ցուցաբերել 50 ընտանիքի, բայց հավաքված օգնության պաշարը հնարավորություն տվեց ձեռք մեկնելու 70-ի: Այս տարի ևս նախատեսված է 50, սակայն որքան կլինի, կախված է բնակչության բարեխղճությունից, և թե որքանով մարդիկ հետևողական կլինեն ծրագրի կարգախոս` ավետարանական պատգամին»,- ասում է ծրագրի պատասխանատուներից Սամվել Վանյանը:

Ինչպես նշում են երիտասարդները, ծրագիրը կարևոր է ոչ միայն նրանով, որ ձեռք են մեկնում կարիքավոր ընտանիքներին, այլ նաև քրիստոնեական պատգամները կյանքի են կոչում գործնականում. «Տարածելով բարեգործության գաղափարը և ձեռք մեկնելով այդ ընտանիքներին՝ մեզ է մնում օգնելու և տալու մեծագույն ուրախությունը, քանզի «առավել երանելի է տալը, քան առնելը»»: 

No comments:

Post a Comment