ԳՈՒԳԱՐԱՑ ԹԵՄ: ԼՌՈՒԹՅԱՆ ՄԵՋ ԼՍԵՆՔ ՄԵՐ ՆԱԽՆԻՆԵՐԻ ՊԱՏԳԱՄԸ

Այս տարի Ցեղասպանության հիշատակման միջոցառումները սկիզբ առան ապրիլի 23-ի երեկոյան կազմակերպված ջահերով երթից։ Մարզկենտրոն Վանաձոր քաղաքում երթը սկիզբ առավ առաջնորդանիստ Սուրբ Գրիգոր Նարեկացի եկեղեցուց և քաղաքի հոգևորականների ու պաշտոնատար անձանց առաջնորդությամբ շարժվեց դեպի Սուրբ Աստվածածին եկեղեցի՝ Սրբոց նահատակաց պուրակ. երթի մասնակիցերը կատարեցին միասնական աղոթք և մոմավառություն։

Ապրիլի 24-ի առավոտյան թեմի բոլոր եկեղեցիների զանգերը հավատավոր բնակիչներին հրավիրեցին Սուրբ Պատարագի:

Վանաձորում Ցեղասպանության նահատակներին նվիրված միջոցառումների բուն վայրն, ամեն տարվա պես, Սուրբ Աստվածածին եկեղեցու Սրբոց նահատակաց պուրակն է, որտեղ վեր է խոյանում Ցեղասպանության զոհերին նվիրվածհուշարձանը ։ Այս տարի լրանում է հուշարձանի կառուցման 10-րդ տարին։ Գուգարաց թեմի առաջնորդ Տեր Սեպուհ արքպիսկոպոս Չուլջյանի օրհնությամբ՝ 2006թ-ին, բարերարությամբ «Սեզամ Գազ» ՍՊԸ տնօրեն Արմեն Մխոյանի, ճարտարապետ Էդիկ Բոջուկյանի նախագծով կառուցվեց Ցեղասպանության զոհերին նվիրված հուշարձանը, որին ամեն տարի խոնարհվում են, լուռ աղոթքներ մրմնջում, ծաղիկներ տեղադրում և հոգեհանգսյան միասնական աղոթք են առ Աստված առաքում բազում հայորդիներ։ Սակայն, սկսած 2015թ.-ից, այսուհետ հուշարձանի առջև հոգեհանգստյան կարգի փոխարեն կատարվելու է բարեխոսության կարգ։ Ցեղապանության նահատակների սրբադասման պատմական արարողությունից հետո սա առաջին տարին է, որ պատարագի ավարտից հետո, հանդիսապետությամբ թեմակալ առաջնորդի և մասնակցությամբ քահանա հայրերի, կատարվեց «բարեխոսական կարգ սուրբ նահատակների, որ զոհվեցին ընթացս Հայոց Ցեղասպանության՝ վասն հաւատոյ եւ վասն հայրենեաց»։

Սրբոց նահատակաց պուրակն այս տարի էլ բազմամարդ էր: Արարողությանը ներկա էին Լոռու մարզպետ Արթուր Նալբանդյանը, Վանաձորի քաղաքապետ Սամվել Դարբինյանը, պաշտոնատար այլ անձինք, մտավորականներ, ուսանողներ, աշակերտներ, ուխտավորներ։

Սրբազան Հայրը հորդորով դիմեց ներկաներին. «Այսօր լռության օր է, ներամփոփվելու և մեր սրբադասված նահատակների լուռ ձայնը լսելու օրն է: 1915 թվականի սրբադասված նահատակները և մեր մղած բոլոր պատերազմներում զենքը ձեռքին քաջաբար նահատակված զինվորներն այսօր մեզ խրատում, պատգամում են` արթուն կացեք և աղոթեցեք, չլինի թե գայթակղվեք, խաբվեք, չլինի թե ատելություն, չարություն, երկպառակություն մտնի ձեր մեջ, չլինի թե չարը ձեր քնած ժամանակ սերմեր ցանի, և առավոտյան տեսնեք՝ եղբայրը եղբոր դեմ թշնամի է. ուշադիր եղեք. արթուն եղեք, քանզի չգիտեք, թե չարը, թշնամին երբ կխորամանկի, երբ կհարձակվի… մեր մեկ ձեռքին զենք, մյուսին խաչ պետք է լինի: Սրբերը մեզ հորդորում են չքնել, չտարվել զեխությամբ` անտարբեր չլինել, հարստության մեջ չկուրանալ, աղքատության մեջ չչարանալ ու չհուսահատվել, հանգստությամբ թմբիրի մեջ չընկնել, այլ մշտապես զգոն լինել և սիրով միաբանվել: Քանզի միայն սիրով կարող ենք հաղթել ոսոխին. սերը հայրենիքի, մեր ազգային սրբությունների, հայի նկատմամբ. զգույշ եղեք, որ այն չմարի... Բացարձակ ճշմարիտ է այս խրատը, որ երկնքից այսօր իջնում է մեր սրբերի շուրթերից` արթո՛ւն կացեք մշտապես և լռության մեջ լսեք ձեր նախնիների պատգամը»: