Օրհնության, գոհության և գնահատանքի խոսք

«Ձեռք մեկնիր եղբորդ» դրամահավաք-ակցիայի մասնակից մեր սիրեցյալ զավակներին

Հայրական սիրով և օրհնությամբ շնորհակալություն եմ հայտնում Վանաձորում անցկացված «Ձեռք մեկնիր եղբորդ» համաքաղաքային դրամահավաք-ակցիայի բոլոր մասնակիցներին` պետական կառույցներ, ԱԺ պատգամավորներ, հիմնարկ-ձեռնարկություններ, իրավապահ մարմիններ, հասարակական կազմակերպություններ, առողջապահական, կրթական, մշակութային, մարզական հաստատություններ, անհատներ, որոնք սիրահոժար կերպով արձագանքեցին մեր նախաձեռնությանը և 20 օրում հանգանակեցին հինգ միլիոն դրամ` Սանկտպետերբուրգյան տնակային ավանում բնակվող խիստ կարիքավոր Քալաշյան ընտանիքի համար բնակարան գնելու նպատակով:

Գոհունակությունս եմ հայտնում Լոռու մարզպետարանին և Վանաձորի քաղաքապետարանին, ի դեմս մարզպետ Արթուր Նալբանդյանի և քաղաքապետ Սամվել Դարբինյանի, ինչպես նաև համայնքի ավագանուն` աստվածահաճո այս գործում մեզ մեծապես աջակցելու համար:

Շնորհակալ եմ նաև վանաձորյան բոլոր լրատվամիջոցներից` ակցիայի ակտիվ լուսաբանման և «ՍԻՄ տպագրատուն» ՍՊԸ տնօրեն Հայկազ Սիմիկյանին` դրամահավաքի բացիկների անհատույց տպագրության համար:

Ուզում եմ առանձնակի գոհունակությամբ շեշտել դրամահավաք-ակցիայի համար ստեղծված հաձնաժողովի բոլոր անդամաների բարեխիղճ և խիստ կազմակերպված աշխատանքը:

Մեր աղոթքն ու բարեմաղթանքներն ենք հղում և շնորհակալություն հայտնում մոսկվայաբնակ վանաձորցի գործարար Արտակ Էվոյանին, ով վստահելով ծրագրի անաչառությանը` մեր թեմին նվիրաբերեց 4 սենյականոց բնակարան, որն էլ հանձնաժողովի որոշմամբ կհատկացվի նույն տնակային ավանում բնակվող խիստ կարիքավոր բազմանդամ մի ընտանիքի: 

Հայտնում ենք, որ բարեգործական այս ծրագիրը շարունակական է, և նրան կարող են մասնակցել բոլոր ցանկացողները:

Թող Աստված օրհնի և սիրո մեջ պահի բոլոր նրանց, ովքեր իրենց գանձերը դիզում են երկնքում:

«Ավելի երանելի է տալը, քան առնելը»

Գործք Առաքելոց, 20.35

Հայ Առաքելական եկեղեցու Գուգարաց թեմի առաջնորդ

Սեպուհ արքեպիսկոպոս Չուլջյան

Ներկայացվում է դրամահավաք-ակցիային մասնակցած կազմակերպությունների ցանկը.